လောကမှာဘယ်အရာမှ အကြောင်းမဲ့မဖြစ်ပါ - ဒေါက်တာ ဖြိုးသီဟ

လောကမှာဘယ်အရာမှ အကြောင်းမဲ့မဖြစ်ပါ

ဟိုတစ်ရက်က Shopping Center ကြီးတစ်ခုကို သွားဖြစ်ပါတယ်။ လက်ဆောင်ပေးစရာရှိလို့ အမျိုးသမီးလက်ကိုင်အိတ် ပေးရင်ကောင်းမလား ဆိုပြီး သွားကြည့်တာပါ။ အောက်ဆုံးထပ်မှာ ရှိတဲ့ အကောင်းစားဆိုင်နှစ်ဆိုင် ဘယ်လိုကွာခြားတယ်ဆိုတာလေး ပြောပြချင်ပါတယ်။

ပထမဆိုင်ကို ၀င်သွားပါတယ်။ အမှန်ပြောရရင် အမျိုးသမီးလက်ကိုင်အိတ် ဆိုတာ ကျွန်တော်နဲ့ မရင်းနှီးပါဘူး။ နာမည်ကြီး Brand တချို့လောက်သာ သိပြီး ဘယ်ဟာ ဘယ်လိုကောင်းတယ်၊ မကောင်းဘူး စသဖြင့် မကြည့်တတ်ဘူး။ သုံးမယ့်ပမာဏတော့ သတ်မှတ်ထားတယ်။ နောက်ပြဿနာတစ်ခုက ကျွန်တော်က ဈေးဝယ်ရင် တအား အားနာတာ။ နှစ်မျိုး သုံးမျိုးလောက် ပြခိုင်းရတာ၊ ဈေးမေးရတာ၊ စမ်းဝတ်ကြည့်ပြီးမှ မယူတော့ဘူး ပြောရတာတွေ မလုပ်ချင်ဘူး။

ဘာအိတ်ကောင်းမှန်းကလည်း မသိ၊ မေးရမှာကလည်း အားနာ ဆိုတော့ တောင်ကြည့်မြောက်ကြည့်သာ ကြည့်နေရတယ်၊ ဘာဝယ်ရမှန်း မသိဘူး။ အဲဒီပထမဆိုင်ရဲ့ အရောင်းဝန်ထမ်းက ကျွန်တော် ၀င်ဝင်ချင်းမှာ စာရင်းလုပ်နေတယ်၊ ကျွန်တော် သဘောကျတာလေးတွေ့လို့ လှမ်းခေါ်တော့ ဈေးတွက်ပြတယ်။ မှန်းထားတဲ့အထဲ ၀င်နေပေမယ့် ကျွန်တော့်စိတ်ထဲ မတန်ဘူးလို့ ထင်မိတယ်။ နောက်တစ်မျိုး ထပ်မေးတယ်။ ဈေးတွက်ပြတယ်။ ကျွန်တော့်စိတ်ထဲ မတန်ဘူးလို့ ထင်ပြန်တယ်။ လက်ဆောင်ဆိုတော့ အပြလေးက လှချင်တာကိုး။ နောက်တစ်ခုကျတော့ ကျွန်တော်မေးရမှာ အားနာလာရော။ အဲဒီအချိန်မှာ သူက ဘာပြောလဲဆိုတော့ “ဒီမှာတော့ ပစ္စည်းတော်တော်များများက ဒီဈေးတွေချည်းပဲ” တဲ့။ ဒါပဲပြောတယ်။ ထုံးစံအတိုင်း ဖြစ်သလို ၀တ်စားသွားတဲ့ ကိုယ့်ကိုယ်ကိုယ်ပဲ အပြစ်တင်လိုက်ပါတယ်။ အမှန်က မတတ်နိုင်တာ မဟုတ်ဘူး။ ကျွန်တော်လိုနေတာက တခြား။ ဒါကို သူမသိဘူး၊ သိအောင်လည်း မကြိုးစားဘူး။ အဲဒါနဲ့ပဲ ဘာမှမပြောတော့ဘဲ လှည့်ထွက်လာခဲ့တယ်။ သူလည်း တွက်လက်စ ဆက်တွက်ရင်း ကျန်နေခဲ့တယ်။

နောက်တစ်ဆိုင် ၀င်တယ်။ ၀င်ဝင်ချင်းမှာပဲ “မောင်လေးရေ၊ ဘာလိုလဲ ကြည့်ပါနော်” ဆိုတဲ့ စကားနဲ့ စနှုတ်ဆက်တယ်။ တွေ့သမျှလူက ဦးလေး အခေါ်ခံနေရတဲ့ ကိုယ့်မှာ မောင်လေး ဆိုတဲ့အသံ ကြားရတာနဲ့ကို ကျေနပ်နေပြီ။ သူ့ကြည့်လိုက်တော့လည်း အလုပ်မှာ တကယ်ကို တက်တက်ကြွကြွ အလုပ်လုပ်နေတဲ့ပုံ ပေါ်နေတယ်။ ထုံးစံအတိုင်းပဲ ကျွန်တော် ဟိုဟိုဒီဒီ ကြည့်တယ်။ ကျွန်တော် ဈေးမေးတဲ့အထိ မစောင့်ဘူး၊ သူက မေးတယ်၊ “မောင်လေး လက်ဆောင်ပေးဖို့လား၊ ဘယ်အရွယ်လဲ၊ သုံးမယ့် Amount သတ်မှတ်ထားတာ ရှိလား”။ ကျွန်တော် ပျော်သွားတယ်၊ “အစ်မရေ ကျွန်တော်သုံးမှာကတော့ ဒီလောက်မှန်းထားတယ်၊ ဟုတ်တယ် လက်ဆောင်ပေးမှာ၊ အသက်က လူလတ်ပိုင်း”။ အဲဒီမှာတင် “ဒါက ခုမှရောက်တာ၊ ဒါကတော့ ၀င်တာ ၃-၄လ ရှိပြီ၊ သီတင်းကျွတ် Discount ရှိမယ်၊ လူလတ်ပိုင်းဆိုတော့ ဒီပုံစံဆို ကြိုက်မယ်မထင်ဘူး” စသဖြင့် ပြောတယ်။ ကျွန်တော်ရွေးလို့ရတဲ့ Option တွေ ချပြလာတယ်။ အဲဒီထဲကမှ ဈေးလည်းသင့်၊ အပြလည်းလှ၊ အသက်အရွယ်နဲ့လည်း လိုက်လောက်တဲ့ အိတ်တစ်လုံး ၀ယ်လာဖြစ်ခဲ့တယ်။

ဆိုလိုတာက ဒီနှစ်ဆိုင် ဘာကွာလဲ။ အထဲမှာ ရောင်းတဲ့ပစ္စည်းတွေချင်းက အတူတူပဲ။ ဘာကွာနေလဲဆိုတော့ ရောင်းတဲ့ အရောင်းဝန်ထမ်းကွာတယ်…။

တစ်ယောက်က စိတ်အားထက်သန်မှုမရှိဘူး။ နောက်တစ်ယောက်က တက်ကြွတယ်၊ ဖော်ရွေတယ်၊ သူ့ကြည့်တာနဲ့ကို ၀ယ်သူက စိတ်ရွှင်လန်းသွားတယ်။

တစ်ယောက်က မေးမှပြောတယ်၊ ဖြေတယ်၊ တုံ့ပြန်တယ် (အဲဒါကို Reactive ဖြစ်တယ်ခေါ်တယ်) နောက်တစ်ယောက်ကတော့ မမေးခင်ကတည်းက ၀ယ်သူရဲ့ လိုအပ်ချက်ကို ဖော်ထုတ်တယ်။ ပြီးတော့ လိုအပ်တဲ့ အကြံဉာဏ်ပေးတယ်။ Proactive ဖြစ်တယ်။

တစ်ယောက်က ဒီလူက ၀ယ်မယ့်ပုံလည်း မပေါ်ပါဘူး ဆိုတာမျိုး တွေးတဲ့အချိန်မှာ နောက်တစ်ယောက်က သူ တကယ်ဝယ်ဖို့ ၀င်လာတာမဟုတ်ဘဲ ကြည့်ရုံမေးရုံလောက် ဆိုရင်တောင် ငါသာ ကောင်းကောင်းရှင်းပြလိုက်ရင် ၀ယ်ချင်ဝယ်သွားမယ်၊ အနည်းဆုံးတော့ စိတ်ကျေနပ်သွားမယ်၊ သူတကယ်လိုတဲ့အချိန်ကျ ငါ့ဆီ ပြန်လာလိမ့်မယ်လို့ တွေးတယ်။

တစ်ယောက်က အရောင်း ဆိုတာ တစ်ဖက်က၀ယ်မှ လို့ထင်တယ်။ နောက်တစ်ယောက်က အရောင်းဆိုတာ ငါ ဘယ်လောက်ရောင်းနိုင်တယ် ဆိုတဲ့အပေါ် အဓိကမူတည်တယ်လို့ တွေးတယ်။

Salesman အမျိုးအစားအရ ပြောရရင် ပထမတစ်ယောက်က Order taker အမှာရှိလာမှပဲ ရောင်းရမယ့်သူ။ နောက်တစ်ယောက်ကတော့ Order creator တစ်ဖက်က မှာလာတာကိုပဲ ထိုင်စောင့်မနေဘဲ အရောင်းရလာအောင် ဖန်တီးတဲ့သူ။

ဝယ်သူကိုလည်း နှစ်မျိုးခွဲလို့ရပါတယ်။ Buyer ၀ယ်ကိုဝယ်မယ့်သူနဲ့ Window shopper ရည်ရွယ်ထားတာ မယ်မယ်ရရမရှိဘဲ ဟိုလျှောက်ကြည့် ဒီလျှောက်ကြည့်ပြီး သဘောကျတာတွေ့မှ ၀ယ်မယ့်သူ။ Buyer နဲ့ တွေ့တဲ့အခါ သိပ်မသိသာပေမယ့် Window shopper နဲ့ တွေ့တဲ့အခါမှာ နှစ်ယောက်ရဲ့ ခြားနားချက်က ကွက်ကွက်ကွင်းကွင်း ပေါ်လာလိမ့်မယ်။ ခုအဖြစ်အပျက်မှာ ကျွန်တော်ဆိုရင် Buyer မဟုတ်ဘူး။ လက်ကိုင်အိတ်ပေးချင်ပေမယ့် ဒါကိုမ၀ယ်ဘဲ တခြားတခုခု ပြောင်းဝယ်ပြီး ပေးလိုက်လည်းရတယ်။ ဒီလိုအနေအထားမှာ ပထမတစ်ဆိုင်က မရောင်းလိုက်ရဘူး၊ ဘာလို့ဆိုတော့ သူ့ဝန်ထမ်းက Order taker ဖြစ်လို့။ နောက်တစ်ဆိုင်က ရောင်းလိုက်ရတယ်၊ သူ့ဝန်ထမ်းက Order creator ဖြစ်လို့။

အရောင်းသမားတစ်ယောက်ရဲ့ စွမ်းဆောင်ရည်ကို S နှစ်လုံးနဲ့ တိုင်းတာပါသတဲ့။ ပထမတစ်ခုက Sales (အရောင်း)၊ နောက်တစ်ခုက Satisfaction (စိတ်ကျေနပ်မှု)။ ဆိုလိုတာက ကိုယ့်ဆီ ရောက်လာတဲ့သူက Window shopper ဖြစ်နေဦးတော့၊ ၀ယ်နိုင်မယ့်ပုံ မပေါက်ဦးတော့၊ စိတ်ကျေနပ်အောင် ရှင်းပြပြောဆိုပေးရမယ်။ ဒါမှ သူတကယ်လိုအပ်လာပြီဆိုတဲ့အခါ ကိုယ့်ဆီပြန်ရောက်လာမယ်။ Sales တက်မယ်။ ဒါကို သဘောမပေါက်ဘဲ ငါရှင်းပြလည်း ၀ယ်မှာမဟုတ်ပါဘူး ဆိုတဲ့စိတ်နဲ့ ခပ်ပေါ့ပေါ့ လုပ်လိုက်လို့ စိတ်ကျေနပ်မှု ရမသွားရင် သေချာတယ်၊ ဒီလူ ဘယ်တော့မှ ကိုယ့်ဆီ ပြန်လာမှာမဟုတ်ဘူး။ ဒါကြောင့် ရောင်းရမှ ကိုယ့် Customer မဟုတ်ဘူး။ ရောင်းရမယ့်လူ မဟုတ်တာ သေချာနေရင်တောင် ကိုယ့်ရဲ့ အမြင့်ဆုံးစွမ်းဆောင်ရည်ကို ပြရမယ်။ အကောင်းဆုံး ဆက်ဆံပေးရမယ်။

အတူတူ အလုပ်လုပ်ကြတာချင်းပဲ၊ ဒါပေမယ့် တစ်ယောက်က အလုပ်ဖြစ်တယ်၊ ထိရောက်မှုရှိတယ်၊ Performance ကောင်းတယ်၊ Customer တွေနဲ့လည်း လူချင်းပါ ရင်းနှီးသွားတယ်၊ အထက်လူကြီးတွေကလည်း ချီးကျူးတယ်၊ သဘောကျတယ်၊ တစ်ဆင့် တစ်ဆင့် တက်တက်သွားတယ်။ အဲဒီလိုတွေ ကြုံတဲ့အခါ ကျွန်တော်တို့ ဘယ်လိုတွေးလဲ။ ဖြစ်မှာပေါ့ သူက ကံကောင်းတာကိုး၊ လူကြီးကို ဘယ်လိုတွေ ၀င်လုံးလိုက်သလဲမှ မသိတာ၊ အမလေး သူက အပြောကတော့ ရွှေမန်းလေ၊ ဒီလိုတွေပဲ တုံ့ပြန်ကြတယ်။ သူနဲ့ကိုယ်နဲ့ ဘာတွေကွာခြားနေတယ်၊ ကိုယ့်မှာ ဘာအားနည်းချက်တွေရှိတယ်ဆိုတာ မဆန်းစစ်မိကြဘူး။

ဒါကြောင့်မို့ သူ့ကိုမှ မျက်နှာသာပေးနေတယ် ဆိုတဲ့ ကံ၊ အထက်လူကြီး၊ Customer ၊ သူတို့တွေကိုပဲ အပြစ်တင်မနေပါနဲ့။ ကိုယ့်အားနည်းချက်ကိုလည်း တွေ့အောင်ရှာပါ။ မြင်အောင်ကြည့်ပါ။

မှတ်ထားပါ။ လောကမှာ အကြောင်းမဲ့ဖြစ်နေတယ် ဆိုတဲ့အရာ ဘာတစ်ခုမှမရှိပါဘူး…။

ဒေါက်တာ ဖြိုးသီဟ
၃.၁၀.၂၀၁၇

2K Shares